مسیحائی کے نام پر موت بانٹنے والا عطائی دو بچوں کا بھی قاتل نکلا

  کراچی: شہر قائد کے علاقے ماڑی پور میں ایک عطائی کلینک سے دو بچوں کی لاشیں برآمد ہوئیں، جن کے قتل میں ملوث سفاک عطائی ملزم کو گرفتار کر لیا گیا ہے۔

دونوں بچوں کی لاشیں سول اسپتال منتقل کر دی گئی ہیں، بچوں کی  شناخت 8 سالہ احمد اور 10 سالہ حسن کے ناموں سے کی گئیں، دونوں سگے بھائی تھے۔

پولیس کے مطابق سفاک ملزم کی شناخت عبد الکریم ولد عطااللہ کے نام سے ہوئی ہے، ملزم کورنگی کا رہائشی اور ماڑی پور، مچھر کالونی جعفر گلی میں عطائی کلینک چلاتا ہے، جبکہ ملزم ڈاکٹر نہیں عطائی ہے۔

پولیس کا کہنا ہے کہ مسیحائی کے نام پر موت بانٹنے والے نے دو چھوٹے بچوں کو اغوا کیا اور بے ہوشی کی دوا دی، نائیلون کی رسی سے ہاتھ پیر باندھ کر اپنے عطائی کلینک کی الماری میں چھپا دیا۔

سفاک ملزم بچوں کے باپ کے ساتھ بچوں کو ڈھونڈنے کا ڈرامہ کرتا رہا، پولیس کو شبہ ہوا اور تفتیش کے دوران ملزم نے سچ اُگل دیا، ملزم کی نشاندہی پر عطائی کلینک کی الماری سے دونوں بچوں کی لاشوں کو برآمد کیا گیا۔

ابھی تک قتل کی وجوہات معلوم نہ ہو سکی، پولیس موقعہ سے شواہد اکھٹے کر رہی ہے۔

The post مسیحائی کے نام پر موت بانٹنے والا عطائی دو بچوں کا بھی قاتل نکلا appeared first on ایکسپریس اردو.

from ایکسپریس اردو » پاکستان https://ift.tt/CmqDyIc