پی ایس ایل ڈائری

’’ہم نے تو ہزاروں روپے کے ٹکٹ خرید لیے ہیں،کیا پی ایس ایل کے میچز پاکستان میں ہوں گے‘‘

کل سے کئی لوگوں نے مجھ سے رابطہ کرکے یہ بات پوچھی اور میں سب کو یہی جواب دیتا رہا کہ فکر نہ کریں مقابلے ضرور ہوں گے، اگر خدانخواستہ یو اے ای منتقل کرنا بھی پڑا تو آپ کو ٹکٹوں کی رقم بورڈ واپس کر دے گا۔

شکرہے ایسی نوبت نہیں آئی اور احسان مانی نے فرنچائز اونرز کے ساتھ پریس کانفرنس میں غیریقینی کا خاتمہ کردیا، پی ایس ایل کے پاکستان میں میچز کا شائقین کرکٹ کئی ماہ سے بے تابی سے انتظار کر رہے ہیں،چند گھنٹوں میں تمام ٹکٹوں کی فروخت اس کا ثبوت ہے، ایسے میں اگر یہاں میچز نہ ہو پاتے تو سب کو بیحد مایوسی ہوتی، ویسے بھی دبئی اور شارجہ میں بیشتر مقابلے خالی گراؤنڈز میں ہوئے۔

فائنل سمیت دیگر اہم میچز میں بھی کراؤڈ کا نہ آنا مایوس کن رہتا، یہ فیصلہ اکیلے پی سی بی کے ہاتھ میں بھی نہیں تھا، یقیناً اسے اعلیٰ حکومتی شخصیات اور سیکیورٹی اداروں سے گرین سگنل ملا تب ہی اعلان کیا گیا، ابتدا میں یہ خبریں سامنے آ رہی تھیں کہ بھارت کے ساتھ کشیدگی کی وجہ سے شاید پاکستان میچز کا انعقاد یو اے ای میں ہی کرائے۔

بعض فرنچائز مالکان نے بھی ابتدا میں یہی کہا تھا کہ غیرملکی کرکٹرز کو سیکیورٹی پر تشویش ہے، لہذا میچز دبئی منتقل کر دیے جائیں، مگر بورڈکاکہنا تھا کہ ملکی اسٹارز کو ہی کھلائیں مگر میچز پاکستان میں ضرور ہوں گے، ایک تجویز یہ بھی سامنے آئی تھی کہ فی الحال کراچی اور لاہور میں شیڈول ابتدائی میچز یو اے ای منتقل کر دیں، اگر حالات میں بہتری آ جائے تو فائنل شہر قائد میں کرا دیں، مگر آخر میں یہی فیصلہ ہوا کہ شیڈول میں کوئی تبدیلی نہیں ہو گی۔

ویسے یہ اچھا ہی ہوا، اگر ہم میچز منتقل کرتے تو سب سے زیادہ خوش بھارت ہوتا جسے پاکستان کی خوشیاں ایک آنکھ نہیں بھا رہیں، اس نے پی ایس ایل کو ناکام بنانے کی کئی کوششیں کیں جواس کے کسی کام نہ آئیں،اب ہمیں بھی میچز کے دوران بہت احتیاط کا مظاہرہ کرنا ہوگا، سیکیورٹی ایجنسیز پہلے بھی انٹرنیشنل میچزکا بااحسن انداز میں انعقاد کرا چکیں، یقین ہے کہ اب بھی ایسا ہی ہوگا۔

The post پی ایس ایل ڈائری appeared first on ایکسپریس اردو.

from ایکسپریس اردو https://ift.tt/2SPHBKA