سری لنکن کوچ کرپشن الزامات کی لپیٹ میں آگئے

کولمبو:  سری لنکا کے فاسٹ بولنگ کوچ نوان زوئسا بھی کرپشن الزامات کی لپیٹ میں آگئے۔

آئی سی سی نے سری لنکن فاسٹ بولر کوچ اور سابق سیمر نوان زوئسا کو اینٹی کرپشن کوڈ کی تین شقوں کی خلاف ورزی کا مرتکب قرار دیتے ہوئے فوری طور پر معطل بھی کردیا ہے۔ ان پر فکسنگ کی کوشش، کسی پلیئر کو غلط سرگرمی پر اکسانے اور آئی سی سی کو تحقیقات کے دوران مکمل معلومات نہ دینے کے الزامات عائد کیے گئے ہیں۔

آئی سی سی کے اینٹی کرپشن آفیشلز نے کولمبو میں زوئسا سے پوچھ گچھ کی جہاں وہ پریکٹس سیشن میں مصروف تھے۔ اس طرح وہ سری لنکا کے دوسرے ہائی پروفائل کرکٹر بن گئے جنھیں حالیہ دنوں میں اینٹی کرپشن کوڈ کی خلاف ورزی کا مرتکب قرار دیا گیا ہے، 2 ہفتے قبل سابق اسٹار کرکٹر سنتھ  جے سوریا پر بھی کوڈ کی خلاف ورزی کا الزام عائد کیا گیا تھا۔

سابق ہارڈ ہٹر ان الزامات کی تردید کرنے کے ساتھ اپنے وکلا کے ذریعے آئی سی سی کو جواب بھی جمع کرا چکے ہیں۔ نوان زوئسا کے پاس چارجز کا جواب دینے کیلیے اب یکم نومبر سے 14 دن کا وقت ہے،آئی سی سی نے واضح کیا ہے کہ اب اس کی جانب اس حوالے سے مزید کوئی تبصرہ نہیں کیا جائے گا۔

یاد رہے کہ اینٹی کرپشن چیف الیکس مارشل نے کچھ عرصے قبل اپنے ٹیم ممبران کے ہمراہ سری لنکا کا دورہ کیا تھا، جس میں انھوں نے حکومتی سربراہان کو ملاقات میں کرکٹ کرپشن کے حوالے سے جاری تحقیقات کے بارے میں بریفنگ دی تھی۔

The post سری لنکن کوچ کرپشن الزامات کی لپیٹ میں آگئے appeared first on ایکسپریس اردو.

from ایکسپریس اردو https://ift.tt/2qnHF3s