کورنگی کی فیکٹری میں زوردار دھماکا؛11 مزدور زخمی

 کراچی: کورنگی کے علاقے پی این ٹی کالونی میں ایک کارخانے میں گیس لیکج کے باعث زور دار دھماکا ہوا جس کے باعث چھت گرگئی اور ملبے تلے دب کر 11 مزدورزخمی ہوگئے۔

ایکسپریس نیوز کے مطابق کورنگی صنعتی ایریا تھانے کے علاقے پی این ٹی کالونی گیٹ نمبر ایک کےقریب قائم کارخانے کی چھت گرگئی۔

اطلاع ملتے ہی پولیس،فائر بریگیڈ اورریسکیوادارے کے اہلکارموقع پرپہنچ گئے۔

امدادی کاموں کے دوران ملبے تلے دبے 11 مزدروں کونکال کر جناح اسپتال منتقل کیا گیا۔ ایک مزدور کی حالت تشویشناک ہے۔

زخمیوں کی شناخت 18 سالہ کامران،20 سالہ علی دینو،25 سالہ سجاد،45 سالہ افتخار،25 سالہ عباس، 20 سالہ شمشاد، 23 سالہ غفار اور انتظار، 18 سالہ پیرن،عاشق اور 35 سالہ عبدالقدوس کےنام سے ہوئی ہے۔

پولیس حکام کے مطابق متاثرہ کارخانے میں بیکری کی اشیاء تیار کی جاتی ہیں اورکارخانے میں مجموعی طور پر 14 مزدور کام کرتے ہیں۔

The post کورنگی کی فیکٹری میں زوردار دھماکا؛11 مزدور زخمی appeared first on ایکسپریس اردو.

from ایکسپریس اردو » پاکستان https://ift.tt/dYb1muW